ប្រែសម្រួល៖ ស-សម្បត្តិ

សិង្ហបុរី៖ បុរសម្នាក់អាយុ២២ឆ្នាំត្រូវបានចាប់ខ្លួនកាលពីព្រឹកថ្ងៃអាទិត្យ (ថ្ងៃទី៩ ខែកុម្ភៈ) បន្ទាប់ពីការប៉ុនប៉ងវាយប្រហារទៅលើបូជាចារ្យម្នាក់នៅវិហារព្រះវិញ្ញាណបរិសុទ្ធ នៅផ្លូវអាប់ផឺ ថមសុន។

ប៉ូលីសបានឱ្យដឹងថា ពួកគេបានទទួលការស្នើសុំជំនួយនៅម៉ោង១០:៣៥នាទីព្រឹក បន្ទាប់ពីហេតុការណ៍ដែលបានកើតឡើងក្រោយពេលបញ្ចប់ពិធីគោរពបូជា ខណៈពេលដែលអ្នកចូលរួមកំពុងចេញទៅ។

យោងតាមការស៊ើបអង្កេតបឋម បុរសជនជាតិចិនសិង្ហបុរីរូបនេះគឺជាអ្នកចូលវិហារជាប្រចាំ។

គាត់ត្រូវបានឃាត់ខ្លួនភ្លាមៗដោយសន្តិសុខវិហារ មុនពេលប្រគល់ទៅឱ្យមន្ត្រីប៉ូលីសដែលឆ្លើយតបទៅកាន់កន្លែងកើតហេតុ។ មិនមានរកឃើញអាវុធក្នុងខ្លួនគាត់ទេ ហើយបូជាចារ្យក៏មិនមានរបួសដែរ។

ប៉ូលីសបានឱ្យដឹងក្នុងសេចក្តីថ្លែងការណ៍មួយថា ជនសង្ស័យត្រូវបានចាប់ខ្លួនពីបទបង្កការរំខានសាធារណៈ ហើយនឹងត្រូវបញ្ជូនទៅវិទ្យាស្ថានសុខភាពផ្លូវចិត្ត (IMH) សម្រាប់ការវាយតម្លៃបន្ថែម។

អាជ្ញាធរក៏បានអំពាវនាវឱ្យសាធារណជនជៀសវាងការស្មានៗ ខណៈពេលដែលការស៊ើបអង្កេតកំពុងបន្ត។

ហេតុការណ៍នេះកើតឡើងប៉ុន្មានខែប៉ុណ្ណោះ បន្ទាប់ពីការវាយប្រហារដាច់ដោយឡែក និងកាន់តែហិង្សាមួយទៀតនៅវិហារសាន់ចូសេហ្វ នៅអាប់ផឺ ប៊ូគីត ទីម៉ា ដែលបូជាចារ្យម្នាក់ត្រូវបានចាក់ក្នុងអំឡុងពេលធ្វើពិធី។

កាលពីថ្ងៃទី៩ ខែវិច្ឆិកា ឆ្នាំ២០២៤ ជនជាតិសិង្ហបុរី បាស់ណាយ៉ាគី គីត ស្ពេនស៊ឺ អាយុ៣៧ឆ្នាំ ត្រូវបានចោទប្រកាន់ថាបានប្រើកាំបិតអាចបត់បានដើម្បីចាក់បិតា គ្រីស្តូហ្វឺ លី នៅក្នុងមាត់។ ការវាយប្រហារនេះដែលបានកើតឡើងក្នុងអំឡុងពេលទទួលទានសក្ការនៅក្នុងពិធីគោរពបូជាសម្រាប់កុមារ បានធ្វើឱ្យបិតា លី ត្រូវការការវះកាត់ ប៉ុន្តែក្រោយមកលោកត្រូវបានអនុញ្ញាតឱ្យចេញពីមន្ទីរពេទ្យ៕

ប្រភព៖ CNA/ac